I Confess!

(Mən êtiraf eləyirəm)

Mən êtiraf eləyirəm öz dilimlə,

özgə dildə söyləsəm də

inanıŋız düz deyirəm!

“yerkürəsi düz” deyirəm!

desəm, yüzdəyüz demişəm!

güvəniŋ, sözsüz demişəm!

bərâdərlər nə desələr mən demişəm, mən nə desəm onlar deyib; sözümüz bir!

öz dediklərimə sım-sıxı ‘gözübağlı’ qatılıram! təkbîr!

soldur dediўim sağ imiş,

gecə göz yaŋılğısıymış, qara gördüўüm ağ imiş!

mən êtiraf eləyirəm: yazılmışam, yaŋılmışam, gerçəkləri zorlamışam

gəncliўimi yava yerə korlamışam!

mən yabançılarıŋ quluymuşam, aldadılmışam

pul almışam, satılmışam

danmıram yabançılarla ilişkimi, danmıram içkimi

tanımıram heç kimi

nə böyük yazıq, sevmişəm, sevilmişəm, sevişmişəm

heç bir işimi danmıram: böyük işlər görmüşəm, kiçik işlər: işəmişəm!

hərzəliўə, qarğaşaçılığa, yağılığa bulaşmışam, suçum özümdən böyük

çöpcük* daşıyıram, miŋlərcə saxıncalı sözcük!

mən: devrimqarşıdı bir devrimçi

yaradılışa inanmayan yoz inanışlı evrimçi!

həm ayrılıqçı bölücü, həm bütövlükçü, bağımsızlıqçı bir ‘pan’am

êtiraf edirəm, utanıram: mən insanam!

mən êtiraf eləyirəm:

buraz* yoxdu, köstək yoxdu, qandal* yoxdu, ip yox idi, sap yoxdu!

gözbağı yoxdu, qolbağı yoxdu; hər yan güldü, hər yan bağdı!

nə qırmızı oda, nə də qaraçala

qonaqpərvərlikləri ə’la!

şırınqa yox! nə həb, nə dava yemişəm; quruntudur, quruntudur…

hər yaşantım monte edilmiş qarabasan görüntüdür!

bu qan deўildir qusduğum

qaşlarım çatıq deўil, sizə deўil küsdüўüm

çox qəşəng yedirilmişəm, ‘işkənbə’ylə bəslənmişəm

tək başıma bir oda ayırıb ağalar, çox şıq

24 saat açıq deўildi ışıq;

betonda deўil, yumuşaq yerdə yatmışam, yaslanmışam!

alnımdakını sorarsan, yıxılmışam, öz-özümə çırpılmışam

eleкtrik gəlməsin ağlınıŋ ucuna, yüŋdən çarpılmışam!

döўülmədim, söўülmədim, bayılmadım, ayılmadım…

izlənmədim, gözlənmədim, közlənmədim… özlənmədim…

köksümdəki dağ deўildir xal-bəŋəkdir*, doğmadır

sırtımdakı o çizgilər, qırmanc izləri deўildir, xal-döўmədir!

mənim kimi satqın biri acımağa dəўməzmiş belə

dodaqdəўməz diləkçəylə

öz sıramda əŋ ağır cəzânı sizdən diləyirəm…

çün êtiraf eləyirəm!

ana qarnında da titrəyərdi əlim

körpəlikdən elə tutulardı dilim

öŋcədən də siŋirlərim gücsüz idi

birzadlar başından əskikdi deyirlərsə, düz idi!

çox yatmışam, biraz yuxu sərsəmiyəm

‘hicrətdən öŋcə’ də elə bir dəriyəm, bir sümüўəm…

mən êtiraf eləyirəm: oŋa özüm vur dedim, vur

ancaq bir anlıq ara ver,

təki burax o qoca-qarını

Burla Xatın’ı…

yox o mənim anam deўilmiş

heç anam yox imiş mənim, ölmüş!

mənim atam əcnəbidir

bir qardaşım Qatır Məmməd, obiri Qaçaq Nəbi’dir…

demə oğluma, qızıma, başıma nələr gəldiўin

dəўmə eşimə; həyatıma, yoldaşıma dəўməyiŋ

dəўmə, döўmə, söўmə, soyma, yetər sayma…

toxunmayıŋ yaddaşıma!

mən êtiraz eləyirəm,

yox bağışla, dilim sürçdü, mən êtiraf eləyirəm!

mən êtiraf eləyirəm təkbaşıma

mən êtiraf eləyirəm boşalıram

êtirafla arınıram, ovunuram, xoş oluram!

söz verirəm, qol çəkirəm, tanımayıram yazanı

and içirəm, artıq pozmaram düzəni

öŋdəriŋizə bağlıyam damarımdan

əlləriŋiz ağrımasın: ‘sâyə’ŋizdə aydınlandım!

mən êtiraf eləyirəm yalançıyam,

yerli deўil, doğma deўil, öz deўiləm, yabançıyam!

*

mən êtiraf eləyirəm aŋlamadım, bilməmişəm!...

mən êtiraf eləyirəm ölməmişəm!...

və bu mənim əlyazımdır

-məni təmizə çəkiŋiz (təmizlikdə qullanıŋız!)-

bu mənim alınyazımdır…

“mən êtiraf eləyirəm!”

22 Haziran 2010

İstanbul

__________________________

* Çöpcük: Bakteri

* Buraz: ‘cable’

* Qandal ‘shackle’ (pranga)

* Bəŋək: kiçik bəŋ (xal)

I Confess!

(من اعتیراف ائله­ییرم) 

   

من اعتیراف ائله­ییرم اؤز دیلیمله،

اؤزگه دیلده سؤیله­سم ده 

اینانینیز دۆز دئییرم! 

"یئرکۆره­سی دوز!"  دئییرم! 

دئسم، یۆزده­یوز دئمیشم! 

گۆوه­نین، سؤزسوز دئمیشم! 

برادرلر نه دئسه­لر من دئمیشم، من نه دئسم اونلار دئییب؛ سؤزوموز بیر! 

اؤز دئدیکلریمه سیم-سیخی ‘گؤزوباغلی’ قاتیلیرام! تکبیر! 

سوْلدور دئدیگیم ساغ ایمیش، 

گئجه گؤز یانیلغی­سییمیش، قارا گؤردویوم آغ ایمیش! 

من اعتیراف ائله­ییرم: یازیلمیشام، یانیلمیشام، گئرچکلری زوْرلامیشام 

گنجلیگیمی یاوا یئره کوْرلامیشام! 

من یابانجیلارین قولویموشام، آلدادیلمیشام 

پول آلمیشام، ساتیلمیشام 

دانمیرام یابانجیلارلا ایلیشکیمی، دانمیرام ایچکیمی 

تانیمیرام هئچ کیمی 

نه بؤیوک یازیق! سئومیشم، سئویلمیشم، سئویشمیشم!

هئچ بیر ایشیمی دانمیرام: بؤیوک ایشلر گؤرموشم، کیچیک ایشلر: ایشه­میشم!... 

هرزه­لیگه، قارغاشاچی­لیغا، یاغی­لیغا بولاشمیشام، سوچوم اؤزومدن بؤیوک! 

چؤپجوک* داشیییرام، مینلرجه ساخینجالی سؤزجوک! 

من: دئوریم­قارشیدی بیر دئوریمچی 

یارادیلیشا اینانمایان یوْز* اینانیشلی ائوریمچی! 

هم آیریلیقچی بؤلوجو، هم بوتؤولوکچو، باغیمسیزلیقچی بیر ‘پان’ام 

اعتیراف ائدیرم، اوتانیرام: من اینسانام! 

  

من اعتیراف ائله­ییرم: 

بوراز* یوْخدو، کؤستَک یوْخدو، قاندال* یوْخدو، ایپ یوْخ ایدی، ساپ یوْخدو! 

گؤزباغی یوْخدو، قوْل­باغی یوْخدو؛ هر یان گۆلدو، هر یان باغدی! 

نه قیرمیزی اوْدا، نه ده قاراچالا 

قوناق­پرورلیکلری اعلا! 

شیْریْنقا یوْخ! نه حب، نه داوا یئمیشم؛ قورونتودور، قورونتودور… 

هر یاشانتیم موْنته ائدیلمیش قاراباسان گؤرونتودور! 

بو قان دئییلدیر قوسدوغوم 

قاشلاریم چاتیق دئییل، سیزه دئییل کۆسدویوم 

چوخ قشنگ یئدیریلمیشم، ‘ایشکنبه’یله بسله­نمیشم!

تک باشیما بیر اوْدا آییریب آغالار، چوْخ شیْق  

24 ساعات آچیق دئییلدی ایشیق؛ 

بئتوْندا دئییل، یوموشاق یئرده یاتمیشام، یاسلانمیشام! 

آلنیمداکینی سوْرارسان، ییْخیلمیشام، اؤز-اؤزومه چیْرپیلمیشام 

ائلئکتریک گلمه­سین عاغلینین اوجونا، یۆندن چارپیلمیشام! 

دؤیولمه­دیم، سؤیولمه­دیم، باییلمادیم، آییلمادیم… 

ایزلنمه­دیم، گؤزلنمه­دیم، کؤزلنمه­دیم… اؤزلنمه­دیم… 

کؤکسومده­کی داغ دئییلدیر؛ خال-بنکدیر*، دوْغمادیر 

سیْرتیمداکی او چیزگیلر، قیرمانج ایزلری دئییلدیر، خال-دؤیمه دیر! 

منیم کیمی ساتقین بیری آجیماغا ده­یمزمیش بئله 

دوْداق­ده­یمز دیلَکچه­یله* 

اؤز سیْرامدا أن آغیر جزانی سیزدن دیله­ییرم… 

چون اعتیراف ائله­ییرم! 

آنا قارنیندا دا تیتریردی ألیم 

کؤرپه­لیکدن ائله توتولاردی دیلیم 

اؤنجه­دن ده سینیرلریم گوجسوز ایدی 

بیرزادلار باشیندان أسکیکدی دئییرلرسه، دۆز ایدی! 

چوْخ یاتمیشام، بیرآز یوخو سرسَمی­یم 

‘هیجرتدن اؤنجه’ ده ائله بیر دری­یم، بیر سۆمویَم… 

من اعتیراف ائله­ییرم: اوْنا اؤزوم "وور" دئدیم، "وور" 

آنجاق بیر آنلیق آرا وئر، 

تکی بوراخ اوْ قوجاقارینی 

بورلا خاتین’ی… 

یوْخ اوْ منیم آنام دئییلمیش 

هئچ آنام یوْخ ایمیش منیم، اؤلموش! 

منیم آتام أجنبیدیر

بیر قارداشیم قاطیر ممّد، اوْبیری قاچاق نبی’دیر… 

دئمه اوْغلوما، قیزیما، باشیما نه­لر گلدیگین 

ده­یمه ائشیمه؛ حیاتیما، یوْلداشیما ده­یمه­یین 

ده­یمه، دؤیمه، سؤیمه، سوْیما، یئتر سایما!… 

توْخونمایین یادداشیما! 

من اعتیراض ائله­ییرم، 

یوْخ باغیشلا، دیلیم سۆرچدو، من اعتیراف ائله­ییرم! 

من اعتیراف ائله­ییرم، تک­باشیما 

من اعتیراف ائله­ییرم، بوْشالیرام 

اعتیرافلا آرینیرام، اوْوونورام، خوْش اوْلورام! 

سؤز وئریرم، قوْل چکیرم، تانیماییرام یازانی 

آند ایچیرم، آرتیق پوْزمارام دوزه­نی! 

اؤندَرینیزه باغلی­یام داماریمدان 

أللرینیز آغریماسین: ‘سایه’نیزده آیدینلاندیم! 

من اعتیراف ائله­ییرم یالانچی­یام، 

یئرلی دئییل، دوْغما دئییل، اؤز دئییلم، یابانچی­یام! 

* 

من اعتیراف ائله­ییرم: آنلامادیم، بیلمه­میشم!... 

من اعتیراف ائله­ییرم: اؤلمه­میشم!... 

و بو منیم أل­یازیمدیر 

-منی تمیزه چکینیز (تمیزلیکده قوللانینیز!)- 

بو منیم آلین­یازیمدیر… 

" من اعتیراف ائله ییرم!"

طوْغرول آتابای   

22 هازیران 2010 

ایستانبول 

__________________________ 

* چؤپجوک: باکتئری 

* یوْز: باطل، سوء

* بوراز: کابل 

* قاندال: ‘پابند’ (پرانگا) 

* بَنَک: کیچیک بَن (خال) 

* دیلَکچه: عریضه